Krizë në Teatrin “Aleksandër Moisiu”: dorëheqjet po zbehin identitetin artistik

Teatri “Aleksandër Moisiu” në Durrës po kalon një periudhë të vështirë, të shoqëruar me një seri dorëheqjesh të figurave të njohura të trupës artistike dhe stafit. Pas largimit të regjisores Driada Dervishi, dorëheqjen kanë dhënë edhe aktorët Gentian

Zenelaj dhe Amos Mujo Zaharia, ndërsa më herët janë larguar edhe Julian Shyti dhe Armand Guzina. Kjo valë largimesh po shihet si shenjë e një krize më të thellë dhe jo si raste të izoluara.

Sipas burimeve brenda institucionit, artistët dhe stafi janë të pakënaqur me mënyrën e menaxhimit, ndryshimet strukturore dhe ndikimin gjithnjë e më të madh të politikës në jetën e teatrit. Riorganizimet e brendshme, shkrirja dhe rikrijimi i sektorëve të ndryshëm kanë shtuar debatet dhe tensionet, ndërsa aktiviteti artistik është zbehur dhe është larg pritshmërive të publikut.

Edhe pse godina e teatrit po rikonstruktohet dhe po flitet për projekte të reja, shqetësimi kryesor mbetet se institucioni mund të humbasë identitetin dhe frymën artistike që e bëri për dekada një nga qendrat më të rëndësishme kulturore në vend.