Studimi: Një e treta e personave që kalojnë COVID-19 vuajnë nga probleme mendore



Një e treta e personave që kanë kaluar COVID-19 trashëgojnë simptoma afatgjata të problemeve të shëndetit mendor, sipas një studimi të ri të publikuar të martën. Studimi zbuloi se brenda gjashtë muajsh, 34 për qind e të mbijetuarve nga koronavirusi janë diagnostikuar me një lloj çrregullimi neurologjik ose psikologjik, sipas shkrimit të publikuar në revistën shkencore “Lancet”.





Diagnoza më e zakonshme ishte ankthi, e detektuar në 17 për qind të rasteve që janë trajtuar për COVID-19, e më pas çrregullime të humorit në 14 për qind të pacientëve.

Studimi gjithashtu zbuloi se efektet anësore nervore ishin më të rënda tek pacientët që kanë vuajtur nga forma më të rënda të virusit.

Rezultatet e studimit janë mjaft të rëndësishme pasi mund të ndihmojnë sistemin shëndetësor të vazhdojë të ndihmojë të mbijetuarit nga virusi.

Ky është studimi më gjithëpërfshirës i këtij lloji ku janë përdorur të dhënat elektronike të më shumë se 236 mijë pacientëve, kryesisht nga SHBA.





Shkencëtarët vunë re se pacientët të cilët kanë kaluae COVID-19 kishin një rrezik 44 për qind më të lartë për të pasur sëmundje psikike krahasuar me persona që thjesht kanë kaluar gripin, si dhe kishte rreth 16 për qind më shumë gjasë që ato të përjetonin këto pasoja krahasuar me pacientë të sëmundjeve të tjera të infeksioneve të rrugëve pulmonare.