Messi shkëlqen dhe Argjentina mposht Australinë, në çerekfinale i pret Holanda

Argjentina ka arritur të fitojë sot në mbrëmje ndaj Australisë, në një ndeshje vërtetë të luftuar dhe intensive, ndërsa Messi ka shkëlqyer në ndeshjen e tij të 1000 në karrierë. 

Goli i parë i ndeshjes erdhi në minutën e 35-të, ku Messi përballë tre kundërshtarëve dërgon topin mjeshtërisht në rrjetë. Pjesa e parë u mbyll me këtë rezultat, por ishte i dukshëm presioni i lartë i ushtruar nga australianët, të cilët treguan që nuk do të dorëzoheshin pa luftuar. 

Pjesa e dytë nisi përsëri në favor të Argjentinës, ku në minutën e 57-të, De Paul dhe Alvarez ushtrojnë presion në zonën e kundërshtarit duke bërë që portieri të humbas topin dhe Alvarez e dërgon në rrjetë. Befasia erdhi në minutën e 77-të, ku Australia e palodhur gjen golin e ngushtimit të rezultatit, me një godtje të ekipit australian që devijohet nga Ferndandez dhe shkon në rrjetë.

Argjentina tentoi edhe disa herë të shënonte golin e sigurisë, por nuk ia doli, ndërsa Australia humbi një rast të pastër në minutën e fundit të ndeshjes, por portieri Martinez u tregua vigjilent. 

Me këtë fitore, Argjentina dhe Messi, i cili po ashtu kaloi edhe Maradonën sot me golat e realizuar për Kombëtaren, kalojnë në fazën çerekfinale, ku do të gjejnë përballë Holandën.

/News31