Futbollisti i talentuar shqiptar lë Bayern Munich për Seria A, ky do të jetë ekipi ku do të luajë!
Arijon Ibrahimovic, futbollisti i talentuar me origjinë nga Kosova, më saktësisht nga Prizreni, do të largohet nga Bayern Munich për ta vazhduar karrierën në elitën e futbollit italian Serie A.
Sulmuesi i talentuar, i cili në fakt deri më sot ka luajtur me moshat e Gjermanisë, pavarësisht interesimit si të Federatës shqiptare dhe asaj kosovare për ta pasur në ekip, është pjesë e Bayern Munich që nga viti 2018, ku ka kaluar nëpër të gjitha grupmoshat e kësaj skuadre, deri në ekipin e parë, teksa në para-sezonin e këtij viti shënoi edhe gol në ndeshjet miqësore.
Edhe pse 17-vjeçari debutoi me ekipin e parë, ai ka vendosur të bëj një hap tjetër në karrierë duke u transferuar në Serie A, ku do të ketë mundësinë të aktivizohet më shpesh edhe në vazhdimësi, teksa sipas gazetarit Gianluca Di Marzio, është skuadra e Frosinone që ka siguruar shërbimet e Ibrahimovic.
Zyrtarizimi i këtij transferimi pritet të bëhet ditën e mërkurë, ndërsa nuk janë bërë akoma me dije detajet, nëse është huazim apo blerje e ekipit italian. Në njoftimin zyrtar të italianit, thihet se Frosinone ka marrë një talent të madh në radhët e veta, ndërsa një javë më parë skuadra e Serie A, po nga Bayerni, ka transferuar edhe sulmuesin tjetër shqiptar Marvin Cuni për shumën e 400 mijë eurove.
Te kjo skuadër janë edhe dy shqiptarët tjerë si Justin Ferizaj dhe mbrojtësi Sergio Kalaj.
— Gianluca Di Marzio (@DiMarzio) August 29, 2023
Ndërkohë nëse nuk jeni në dijeni, Arijon Ibrahimovic është me origjinë nga Prizreni, dy prindërit e tij janë shqiptarë dhe mbiemri i tyre ka qenë Ibrahimi, ndërsa sigurisht, nuk kanë lidhje me futbollistin e famshëm, Zlatan Ibrahimovic.
/News31