NEWS 15 Janar 2022, 15:30

Fëmijët preken më shumë nga Omicron? Epidemiologu publikon studimin

Fëmijët preken më shumë nga Omicron? Epidemiologu publikon


Rritja e rasteve ditore në vendin tonë është përkthyer padyshim edhe në një rritje të rasteve aktive në të gjithë vendin, ku aktualisht janë të infektuar rreth 15 mijë pacientë.

Kjo rritje e rasteve ka ardhur si rezultat i variantit të ri të COVID, Omicron, por edhe si pasojë e mosrespektimit të masave të vendosura, që kanë kulmuar gjatë festave.

Si të gjitha variantet e tjera, edhe Omicron është shoqëruar me mite e shumë polemika. Thuhet se ai prek më shumë fëmijët, madje ata e kalojnë më rëndë.

Lidhur me këtë, ka folur epidemiologu Ilir Alimehmeti. Ai shpjegon se pavarësisht se Omicron ka një përhapje të lartë, nuk është më i rëndë sa Delta.

Në njëfarë mënyrë epidemiologu hedh poshtë mitin se fëmijët janë ata që e vuajnë më shumë variantin e ri.

Teksa analizon studimet, Alimehmeti sqaron se rezultatet janë të qarta në favor të ecurisë klinike më të lehtë të Omicron kundrejt Deltës dhe se këto rezultate tregojnë se varianti Omicron është qenësisht më i lehtë se sa varianti Delta për fëmijët 0-5 vjeç.

Analiza e plotë

"Nëse duhet të ketë shqetësime, ato m’i lini mua, në mënyrë që fëmija im të ketë paqe.”
Cit.: Thomas Paine
Miti që qarkullon aktualisht është se: “fëmijët e vuajnë më shumë variantin Omicron”!
Fakti është se: “SARS-CoV-2 gjithnjë i ka prekur shumë më lehtë fëmijët dhe Omicron është shumë më i lehtë se Delta”
Studiuesit e Universitetit Case Western Reserve (SHBA) studiuan në detaj:
7.198 fëmijë 0-5 vjeç të infektuar për herë të parë në periudhën kur >92% e rasteve ishin Omicron dhe
7.198 fëmijë 0-5 vjeç të infektuar për herë të parë në periudhën kur të gjitha rastet ishin Delta.
Në studim nuk luajti rol imuniteti preekzistues, sepse:
fëmijët 0-5 vjeç, siç e dini, janë të gjithë të pavaksinuar dhe
në studim u morën vetëm fëmijët e infektuar për herë të parë.
Në studim për shkak të metodologjisë çiftuese, fëmijët janë të njëjtë për sa i përket:
moshës
gjinisë
nivelit socio-ekonomik
sëmundjeve bashkëshoqëruese dhe

mjekimeve të marra prej tyre.
Rezultatet janë të qarta në favor të ecurisë klinike më të lehtë të Omicron kundrejt Deltës!
Shtrimet në spital:
1.0% e fëmijëve me Omicron;
3.1% e fëmijëve me Delta;
67% më pak risk për t’u shtruar në spital gjatë valës Omicron.
Shtrimet në terapi intensive:
0.14% e fëmijëve me Omicron;
0.43% e fëmijëve me Delta;
68% më pak risk për t’u shtruar në terapi intensive gjatë valës Omicron.
Ventilimi mekanik:
0.33% e fëmijëve me Omicron;
1.15% e fëmijëve me Delta;
71% më pak risk për të pasur nevojë për ventilim mekanik gjatë valës Omicron.
Autorët dalin në përfundimin:
* Të marra së bashku, këto rezultate tregojnë se varianti Omicron është qenësisht më i lehtë se sa varianti Delta për fëmijët 0-5 vjeç.
Dr. Shk. Ilir Alimehmeti
Epidemiolog Klinik
Fakulteti i Mjekësisë, UMT
Akademia e Shkencave të Shqipërisë

/News31