Dyfishohet çmimi i patentës? Drejtori i DPSHTRR sqaron ndryshimet

Një lajm i ditëve të fundit në media bënte me dije se ishte marrë një vendin nga institucionet përkatëse në lidhje me patentat, cka gati do e dyfishonte cmimin e tyre dhe do e conte në 850 mijë lekë. Megjithatë sot, drejtori i DPSHTRR,  Blendi Gonxhja ka reaguar në një postim në rrjetet sociale, ku thotë se lajmi për çmimin e patentës është i gabuar, ndërsa thekson se lajmi i vërtetë është fund i fiktivitetit në autoshkolla.

Ndër të tjera Gonxhja shprehet se as nuk do të rritet e as nuk do të dyfishohet çmimi i patentës, por do të eliminohet evazioni fiskal dhe informaliteti në sektorin e Autoshkollave dhe se do të goditet fenomeni i sekserëve që kapin kursantë për ti përdorur Autoshkollat si NIPT-e apo sa për letra, pa u kryer procesi mësimor, duke iu shmangur kurseve në teori e praktikë, në këmbim të një pagese të ulët dhe të parregullt.

Deklarata e plotë e Gonxhes:

“Lajmi bombastik se “dyfishohet patenta” është LAJM I GABUAR! Lajmi është: FUND FIKTIVITETIT në Autoshkolla! Zbatim rigoroz i programit të formimit për Leje Drejtimi! Fund lojës me Sigurinë Rrugore! Fund zhvlerësimit të profesionistëve dhe degradimit të tregut të Autoshkollave!

As rritet e as dyfishohet çmimi i patentës! Eliminohet evazioni fiskal dhe informaliteti në sektorin e Autoshkollave!

Nuk rritet asnjë tarifë publike që lidhet me shërbimin dhe lëshimin e Leje Drejtimit!

Goditet fenomeni i sekserëve që kapin kursantë për ti përdorur Autoshkollat si Nipte apo sa për letra, pa u kryer procesi mësimor, duke iu shmangur kurseve në teori e praktikë, në këmbim të një pagese të ulët por të parregullt! Luftohet konkurrenca e pandershme dhe paligjshmëria!

Fiton Siguria Rrugore! Rriten standardet e mësimdhënies në Autoshkolla! Merr dinjitet dhe vlerë aktiviteti dhe misioni i Autoshkollave!

DPSHTRR zbaton aktet ligjore në fuqi që përcaktojnë programin e detyrueshëm zyrtar të përgatitjes në Autoshkolla, kryerjen e plotë dhe transparent të tij!

Siguria Rrugore kërkon Autoshkollim serioz, proces kritik që nuk mund të garantohet pa kushtet logjistike, kapacitetet teknike e didaktike që përkthehen në kosto të domosdoshme! Kurset gjysmake, shkollimi i munguar, kontratat fiktive, punësimi në të zezë ose fiktiv, regjistrat fiktivë të pjesëmarrjes në orët mësimore, janë parathënia e aksidenteve dhe fataliteteve rrugore, kostove sociale e ekonomike që tejkalojnë sektorin e Autoshkollave duke cënuar tërë shoqërinë, sigurinë publike dhe aspiratat integruese!

Marrëveshja DPSHTRR DPT Shoqatat e Autoshkollave është investimi më i fortë për cilësi Autoshkollimi, mbrojtje konsumatori e Siguri Rrugore!”, 

/News31