Debati Haradinaj-Vuçiç, ish-kryeministri i Kosovës: “Njihni pavarësinë ose bashkohemi me Shqipërinë”



Presidenti i Serbisë Aleksandër Vuçiç ka reaguar ditën e sotme pas deklaratës së ish-kryeministrit të Kosovës Ramush Haradinaj, i cili paralajmëroi referendum për bashkim me Shqipërinë në se rast se vendi i tij do të vijojë të mbetet jashtë BE-së

Në reagimin e tij, Vuçiç është shprehur i shqetësuar për këtë deklaratë, madje duke thënë se krijimi i Shqipërisë së Madhe është kërcënim jo vetëm për Serbinë, por për të gjithë Europën. Presidenti serb theksoi se deklarata e Haradinaj duhet shqyrtuar në mënyrë shumë serioze, pasi sipas tij ai është politikan serioz, i fuqishëm dhe i rrezikshëm.

 “Nëse ai zgjidhet në ndonjë funksion dhe nëse bashkëpunon me Kurtin është e qartë se ata të dy angazhohen për bashkim. Ne këtë e pranojmë si fakt politik, prandaj do të guxojmë të reagojmë. Krijimi i “Shqipërisë së Madhe” është kërcënim për Serbinë dhe BE-në”, ka thënë Vuçiç, i cili po ashtu tha se pret reagime edhe nga Brukseli:

“Do të doja të dëgjoj më shumë reagime nga Brukseli dhe Washington-i dhe qendrat tjera e fuqishme botërore, sepse mos dhashë Zoti këtu tek ne dikush të thoshte diçka të tillë, mos të them do na bombardonin.”

Pas këtyre deklaratave nuk ka munguar edhe një përgjigje nga Haradinaj, i cili përmes një postimi në rrjetet sociale, tha se për sa kohë i duket i rrezikshëm Vuçiç-it dhe Serbisë, atëherë është në rrugën e drejtë.

Ish-kryeministri i Kosovës i bën thirrje Presidentit të Serbisë që të mos ketë frikë pasi Kosova po kërkon vetëm atë çka i takon:

“Nëse ju dhe të tjerët dëshironi ta shmangni një referendum mbi bashkimin e Kosovës me Shqipërinë në vitin 2025, ka një mënyrë shumë të thjeshtë: Serbia ta njohë Kosovën si shtet të pavarur.”

Reagimi i plotë i Haradinaj: 

Për sa kohë i dukem i rrezikshëm Aleksandër Vuçiqit dhe Serbisë, jemi në rrugë të drejtë!

Mos keni frikë, z. Vuçiq. Nuk keni nevojë të jeni nervoz. Kosova vetëm po e kërkon atë që i takon.

Nëse ju dhe të tjerët dëshironi ta shmangni një referendum mbi bashkimin e Kosovës me Shqipërinë në vitin 2025, ka një mënyrë shumë të thjeshtë: Serbia ta njohë Kosovën si shtet të pavarur.

Tutje, Kosova e di rrugën e saj drejt anëtarësimit në NATO, BE dhe OKB. Me retorikë histerike nuk do të na ndaloni në të drejten tonë për të definuar të ardhmen e Kosovës.

Të gjithë duhet ta dinë që deklarata dhe betimi im për bashkim me Shqipërinë vjen si rezultat i neglizhencës së vazhdueshme të Brukselit në lidhje me Kosovën. Kosova dhe qytetarët e saj janë më pro-perëndimorët dhe si të tillë nuk e meritojnë të përbuzen, injorohen dhe kushtëzohen në pafundësi!”

/News31