Ndryshimet në Kodin Zgjedhor, Ambasada Amerikane kritikon qeverinë: “Për të ardhur keq”



Ambasada e SHBA-së ka reaguar pas miratimit në Parlament ditën e sotme, të ndryshimeve në Kodin Zgjedhor, në lidhje me koalicionet, listat dhe pragun zgjedhor.





Në deklaratën kritike ndaj mazhorancës, Ambasada thotë se palët duhet të vazhdonin diskutimet në Këshillin Politik dhe të gjenin konsensus si për marrëveshjen e 5 qershorit.

Sipas saj, është për të ardhur keq që shumica dështoi të respektonte përkushtimin e deklaruar prej vetë asaj, për të kërkuar emërues të përbashkët në Këshillin Politik.

Reagimi i plotë i Ambasadës Amerikane:

Shtetet e Bashkuara i kanë shtyrë udhëheqësit e Shqipërisë – brenda dhe jashtë parlamentit – për t’u angazhuar me njëri tjetrin në mënyrë transparente dhe përfshirëse për çështje me rëndësi kombëtare. Ky lloj angazhimi pozitiv prodhoi marrëveshjen e 5 qershorit për reformën zgjedhore. Nga ajo kohë, kemi bërë të qartë që marrëveshja e 5 qershorit duhet të respektohet dhe se çfarëdo masash shtesë duhen shqyrtuar dhe miratuar në mënyrë të ngjashme transparente dhe përfshirëse në Këshillin Politik. Sot, partia qeverisëse ndaloi diskutimet në Këshillin Politik dhe votoi për të miratuar ndryshime domethënëse të rregullave që do të qeverisin zgjedhjet e 25 prillit. Ndërkohë që ishte brenda kompetencave të parlamentit për t’i miratuar këto ndryshime, dhe ndërkohë që këto ndryshime janë shtesë – dhe jo shkelje – të marrëveshjes së 5 qershorit, është për të ardhur keq që shumica dështoi të respektonte përkushtimin e deklaruar prej vetë asaj për të kërkuar emërues të përbashkët në Këshillin Politik. Shqipëria është anëtare e NATO-s, aspiruese për anëtarësim në Bashkimin Europian, dhe Kryesuese e radhës e OSBE-së. Është detyrë e udhëheqësve të Shqipërisë – duke filluar por jo vetëm ata në pushtet – për të kërkuar nga vetja një standard më të lartë dhe për të siguruar lirinë dhe ndershmërinë e zgjedhjeve të ardhshme. Këtë pritshmëri e kemi ashtu si populli shqiptar.”





/News31

Burimi: Newsbomb